Vawiin ni 5.3.2024 (Thawhlehni) hian Mizoram hmun dang rual in Kolasib District ah naupang kum 5 hnuailam hnenah Zenghri umbo beihpui (Intensified Pulse Polio Immunization (IPPI)) 2024 chu Pu John LT Sanga, Kolasib District Bawrhsap chuan Bata Kawt, Diakkawn, Kolasib-ah hawngin District Task Force on Immunization (DTFI) Committee member ten telpui in, UNICEF atanga Monitoring & Supervisor  Ms. Rebecca chuan he hun hi a rawn telpui bawk a ni.

   Hawnna inkhawm hi Dr. R.K Lalthlamuana, Senior Chief Medical Officer, Kolasib District chuan kaihruaiin, kalkhawm te lawmna thu a sawi a ni.

     He Zenghri umbo (IPPI) 2024 hawnnaah hian Khuallian chuan, "Fate enkawl tur hian nu te chauh ni lo Pa te hi kan chet chhuah ve a hun tawh" tih sawiin, fate seilenna kawngah chhungkaw Pa ber kan pawimawh thu a sawi. Tin, khawvel hmun hrang hrangah Polio eliminated (um bo) a la nih ve loh avangin, zenghri in kan tu leh fate hriselna a tih buai loh nan leh Polio kan eradicate (tih bo) a nih theih nan Polio vaccine hi kan tu leh fate hnen a dawn tir vek turin a kalkhawm te a sawm a ni.

     Kolasib District-ah hian hmun 122 (booths) ah Zenghri damdawi hi pek a ni a, zin veivak leh khawlai kal ten an eina tur hmun hnihah; Diakkawn, Opp. Brig C Vankunga shopping mall leh District Hospital area/Casulity/OPD kawt-ah te siam niin, Mobile team pakhat in Thingdawl Polytechnic a raltlante hnenah vaccine hi an pe bawk. Hard to Reach Area/High Risk Area (HRA) hmun 9-ah Sesih, Phaipheng, N. Thinglian, Old Builum, Awrpuara Veng, S. Chhimluang, Rasdali & Dilzau ah te neih a ni a, heng zinga hmun 5 te hi Bru khua (Settled HRA) niin, hmun dang 4 te hi Migratory HRA te an ni. Heng HRA ah hian team ten a remchan dan angin naupang te hnen ah vaccine pek a ni.

     Vawiin dar tlai dar 5:45 thleng a Booth a pek zat chu 7352 niin, HRA ah 307 pek a ni a, Transit ah 71 pek niin, Mobile team ten 14 an pe a ni. Kumin Zenghri umbo beihpui thawh khatnaah hian Kolasib District-ah naupang kum 5 hnuailam 8389 pek tura ruahman (Target) a ni. Booth day a pek zawng zawng zat chu 7744 a ni. Naktuk hian House to House tan a ni ang a, vawiin lama pek hmaih palh awmte zawng chhuakin an kalchilh ang.