Vawiin ni 2.2.2024 (Zirtawpni) hian National Tobacco Control Programme (NTCP), Kolasib chuan DC Circuit House Conference Hall, Kolasib-ah Kolasib khawpui chhunga Kohhran hrang hrang hruaitute pualin vaihlo ṭhat lohzia zir hona training an buatsaih.

     NTCP State Nodal Officer Dr H. Lianthangpuia chuan he hun hi hmanpuiin, Mizorama zuk leh hmuam hluar ta lutuk chu veiawm a tih thu leh kohhran mipuiteah zirtirna nasa zawk neih ṭul a tih thu a sawi a. Global Adult Tobacco Survey (GATS), 2016-17 data angin Mizoram hi tun dinhmunah India ramah vaihlo hman nasat lamah pahnihna kan ni mek tih sawiin, hei vang hian a kaihhnawih natna hrang hrang, a bikin Cancer-ah pawh kan sang hle a ni, a ti a. Vaihlo ṭhat lohzia inzirtirna leh zuk leh hmuama fihlim tura hma laknaah kohhran hruaitu kal khawmte chu thawh hopuiah a sawm a, India ram state hrang hrang zingah Mizoram chu zuk leh hmuamah a la sang fal, Vaihlo hi natna hrang hrang thlen theitu a ni tih pawh a sawi. Cancer thlentu zuk leh hmuamah population based-in Mizoram hi kan sang fal hle a, chumi bakah HIV-ah pawh population based bawkin India ramah kan sang ber a ni tiin Hepatitis-ah pawh zirchianna la awm lo mahse kan sang ber ang tih a hlauhawm. Heng kan sanna hrang hrang te hi kan Kristianna nen pawh a in hmeh lo a ti bawk.

     He hun hi DR.RK.Lalthlamuana, Sr.CMO cum District Nodal Officer (NTCP)  chuan kaihruaiin, vaihlo dona kawnga ṭan lakpui turin kal khawmte a sawm a. vaihlo kaihhnawih chu India mipuite hriselna tichhetu ber ni mahse District NTCP-ah thawktu mi 4 lekin Kolasib district mipui singkua sanga vel an enkawl a, an in daih si loh avangin kohhran hruaituten midang zirtir kawngah theihtawp an chhuahpui a tul tih a sawi. Pi Sylvia Zomuanpuii, Social Worker, NTCP Kolasib chuan hunserh a hmang a. NTCP State Consultant Pu R. Lalremruata chuan Mizorama NTCP hma lakna hrang hrang tar langin, vaihloin hriselna a nghawng dan bakah, vaihlo khuahkhirhna dan (COTPA 2003) chungchang te a lem nen a zirtir a. Sawi hona hun ṭha tak hman a ni bawk.